Google-ის ყოველწლიური ტექნოლოგიური ღონისძიება — Made by Google სულ რამდენიმე კვირაში (12 აგვისტოს) გაიმართება, რაც იმას ნიშნავს, რომ ინტერნეტსივრცეში ახალი პროდუქტების შესახებ გაჟონილმა ინფორმაციამ პიკს მიაღწია. სულ ცოტა ხნის წინ თუ Pixel 11 სერიის სმარტფონების ფერებზე ვსაუბრობდით, დღეს უკვე ჯერი Pixel Watch 5-ზე მიდგა.
ინსაიდერულმა პლატფორმამ The Tide Chart ცნობილ ტექნო-დეტექტივთან, OnLeaks-თან ერთად, ახალი ჭკვიანი საათის ოფიციალური პრეს-რენდერები გაავრცელა. კადრებიდან ნათლად ჩანს, თუ რა ფერებში ვიხილავთ Google-ის მომავალ ფლაგმანურ აქსესუარს.
ნაცნობი დიზაინი, ახალი ფერები
ვიზუალური თვალსაზრისით, Google რევოლუციურ ცვლილებებს არ გეგმავს და კვლავინდებურად ერთგული რჩება თავისი საფირმო, მომრგვალებული და ამობურცული (domed) ეკრანის დიზაინისა. ეს იდეალური სიახლეა მათთვის, ვისაც უკვე აქვს ძველი თაობის Pixel Watch. ვინაიდან საათის ფორმა უცვლელია, თქვენი საყვარელი ძველი სამაჯურები ახალ მოდელზეც უპრობლემოდ მოერგება.
სამაგიეროდ, Google-მა სრულად განაახლა ფერების პალიტრა, რომელიც იდეალურად მიესადაგება მომავალ Pixel 11-ის სერიას. გაჟონილი ინფორმაციით, ბაზარზე ოთხი ძირითადი კომბინაცია გამოვა:
-
Dark Anthracite (მუქი ანტრაციტი) — შავი ფერის სამაჯურით.
-
Natural Silver (ბუნებრივი ვერცხლისფერი) — ღია ნაცრისფერი სამაჯურით.
-
Pyrite (პირიტი / ოქროსფერი ტონი) — ზეთისხილისფერი (olive) სამაჯურით.
-
Warm Gold (თბილი ოქროსფერი) — მარჯნისფერი (coral) სამაჯურით.
საინტერესო დეტალი: გავრცელებული მასალების მიხედვით, Warm Gold (მარჯნისფერი სამაჯურით) მხოლოდ პატარა, 41 მმ-იან მოდელზე იქნება ხელმისაწვდომი, თუმცა გამორიცხული არ არის, რომ პრეზენტაციაზე ის 45 მმ-იან ვერსიაშიც ვიხილოთ.
Pixel Watch-ის ისტორიაში პირველი ფასების ზრდა?
დიზაინის გარდა, გაჟონა მოწყობილობის ფასებმაც, რომელიც ბიუჯეტური ნამდვილად არ იქნება. თუ აქამდე Google ინარჩუნებდა სტაბილურ ფასებს, Pixel Watch 5-ის შემთხვევაში პირველად ფიქსირდება ფასების მატება, განსაკუთრებით კი 41 მმ-იან მოდელებზე:
| მოდელი | კავშირი | სავარაუდო ფასი (აშშ) |
| Pixel Watch 5 (41mm) | Wi-Fi | $399 (გაიზარდა $50-ით) |
| Pixel Watch 5 (41mm) | LTE | $499 |
| Pixel Watch 5 (45mm) | Wi-Fi | $429 |
| Pixel Watch 5 (45mm) | LTE | $529 |
ევროპულ ბაზარზე ფასი შესაბამისად €419-დან დაიწყება და €549-მდე ავა.
რა იმალება კორპუსის მიღმა?
მიუხედავად ვიზუალური იდენტობისა, ტექნიკური მახასიათებლები მნიშვნელოვნად უმჯობესდება. არაოფიციალური წყაროების მიხედვით, Google-მა შესაძლოა საბოლოოდ თქვას უარი Qualcomm-ის პროცესორებზე და საათში საკუთარი, სპეციალურად სმარტ-ვოჩებისთვის შექმნილი Tensor ჩიპი ჩააშენოს, რაც ბატარეის ენერგოეფექტურობას საგრძნობლად გაზრდის.
საათს ექნება სრული მხარდაჭერა ისეთი აუცილებელი ტექნოლოგიების, როგორიცაა: NFC, GPS და UWB (Ultra-Wideband). მოწყობილობა გაყიდვაში პირდაპირ ახალი Wear OS 7 ოპერაციული სისტემით ჩაეშვება.
პრეზენტაცია 12 აგვისტოსაა ჩანიშნული, ხოლო მაღაზიების დახლებზე ახალი სმარტ-საათები, სავარაუდოდ, 20 აგვისტოდან გამოჩნდება.